ఏ ఆదేశాలు లేకుండా అరెస్టులు జరిగాయా - ప్రొ.నాగేశ్వర్.. Posted on: Mon 24 Feb 16:08:07.703851 2014

హైదరాబాద్ : అంగన్ వాడీ కార్మికులపై ప్రభుత్వం వ్యవహరించిన తీరును ఎమ్మెల్సీ, ప్రొ.కె.నాగేశ్వర్ తప్పుబట్టారు. ఏ ఆదేశాలు లేకుండా అంగన్ వాడీ కార్మికులను అరెస్టు చేశారా ? అని ఆయన ప్రశ్నించారు. తమ సమస్యలు పరిష్కరించాలంటూ ఇందిరాపార్కు వద్ద ఆందోళన చేస్తున్న అంగన్ వాడీ కార్మికులపై పోలీసులు ప్రతాపం చూపిన సంగతి తెలిసిందే. అంగన్ వాడీలకు మద్దతు తెలిపేందుకు ప్రొ.ఎమ్మెల్సీ కె.నాగేశ్వర్ ఇందిరాపార్కుకు వచ్చారు. ఈ సందర్భంగా ఆయన మీడియాతో మాట్లాడారు. ధర్నాలో పాల్గొనేందుకు వస్తున్న అంగన్ వాడీలను పోలీసులు ఎక్కడికక్కడనే అరెస్టు చేశారని, మాకున్న సమాచారం మేరకు 25-30వేల అంగన్ వాడీలను పోలీసులు అరెస్టు చేశారని పేర్కొన్నారు. ఆదివారం రాత్రి ఇంటింటికి వెళ్లి అరెస్టు చేశారని, ప్రభుత్వం లేకపోతే అరెస్టులు జరిగేవా ? ఏ యంత్రాంగం ఆదేశాలు ఇచ్చిందో ఆ యంత్రాగమే సమస్యలు పరిష్కరించాలని డిమాండ్ చేశారు. వీరి సమస్యలు తీర్చాలని ప్రభుత్వం దృష్టికి పలుమార్లు తీసుకొచ్చినా పరిష్కరించలేదని నాగేశ్వర్ విమర్శించారు.