ఉధృతం కానున్న విద్యుత్ పోరు..

Posted on: Wed 29 Jan 14:43:25.046281 2014

హైదరాబాద్ : వేతన సవరణ, వేతనాల పెంపు కోరుతూ విద్యుత్ ఉద్యోగులు ఆందోళనబాట పట్టారు. భవిష్యత్ కార్యాచరణలో భాగంగా ఆందోళనా
కార్యక్రమాలను ప్రకటించారు. ఈ మేరకు ఫిబ్రవరి 4, 5 తేదీల్లో నల్ల బ్యాడ్జీలతో విధుల నిర్వహణ, 6న పెన్‌డౌన్‌, 7న జిల్లాల్లో ధర్నా, 8న విద్యుత్‌ కార్యాలయాల ఎదుట ధర్నా చేయనున్నట్టు పేర్కొన్నారు. అప్పటికి ప్రభుత్వం దిగిరాకపోతే 17న చలో హైదరాబాద్, 18 నుంచి నో వర్క్ నిరసన కార్యక్రమాల్ని నిర్వహించాలని జేఏసీ ప్రకటించింది. ఇప్పటికే .. రాష్ట్ర వ్యాప్తంగా ఉన్న సుమారు 14 సంఘాలకు చెందిన సిబ్బంది ధర్నాలో పాల్గొన్నారు. దీనిలో భాగంగా వారు విద్యుత్ సౌధాను ముట్టడించి ఆందోళనకు దిగారు. తమ డిమాండ్లు నేరవేరకపోతే ఆందోళన తీవ్రతరం చేస్తామని ప్రభుత్వాన్ని హెచ్చరించారు. విద్యుత్ ఉద్యోగుల నిరసనలతో నగరంలో ఉద్రిక్త పరిస్థితులు నెలకొన్నాయి. వేతన సవరణ కమిటీ నియమించి తమకు న్యాయంగా రావాల్సిన జీతాలను వెంటనే పెంచాలని ఉద్యోగులు డిమాండ్ చేస్తున్నారు.

ప్రభుత్వం పరిష్కారం చూపాలి...

విద్యుత్ ఉద్యోగులకు ప్రతి నాలుగేళ్లకోసారి వేతన సవరణ జరుగుతుంది. అందులో భాగంగా ఏప్రిల్‌ నెలకల్లా జీతాలు పెంచాల్సి ఉంది. సవరణ జరగాలంటే మూడు నెలల ముందుగా ఒక కమిటీ వేయాల్సి ఉంటుంది. కమిటీ నియామకం ఇప్పటి దాకా జరగలేదు. అందుకే వెంటనే వేతన సవరణ కమిటీని నియమించాలని ఏపీ పవర్ ఎంప్లాయిస్‌ జేఏసీ డిమాండ్ చేస్తోంది. ప్రభుత్వం వెంటనే తమ సమస్యల పరిష్కారానికి తగిన చర్యలు తీసుకోవాలని జేఏసీ నేతలు డిమాండ్ చేస్తున్నారు. లేనిపక్షంలో అంచెలంచెలుగా ఆందోళనలు తీవ్రతరం చేస్తామని హెచ్చరిస్తున్నారు