మున్సిపల్‌ ఉద్యోగుల సమ్మె విరమణ

మున్సిపల్‌ ఉద్యోగుల సమ్మె విరమణ

Posted on: Thu 13 Feb 05:37:32.653057 2014

-ప్రభుత్వంతో చర్చలు సఫలం -ఐఆర్‌కు అంగీకారం -దశలవారిగా ఇతర సమస్యల పరిష్కారం -మంత్రి మహిధర్‌రెడ్డి ప్రజాశక్తి-హైదరాబాద్‌ బ్యూరో

మున్సిపల్‌ కాంట్రాక్టు, ఔట్‌ సోర్సింగ్‌ ఉద్యోగులు సమ్మె విరమించారు. కనీస వేతనాలు, ఇతర సమస్యలు పరిష్కరించాలని కోరుతూ గత ఐదు రోజులుగా మున్సిపల్‌ కాంట్రాక్టు, ఔట్‌ సోర్సింగ్‌ ఉద్యోగులు సమ్మె చేపట్టిన విషయం తెలిసిందే. గత రెండు దఫాలుగా కార్మిక సంఘాలతో ప్రభుత్వం జరిపిన చర్చలు విఫలం కావడంతో ఉద్యోగులు సమ్మెను మరింత ఉధృతం చేశారు. బుధవారం నిర్వహించిన చలో అసెంబ్లీ రణరంగంలా మారడంతో చర్చలకు రావాలని ప్రభుత్వం కార్మిక సంఘాలను ఆహ్వానించింది. బుధవారం
సాయంత్రం సచివాలయంలో మున్సిపల్‌ శాఖ మంత్రి మహిధర్‌రెడ్డి, హైదరాబాద్‌ నగర మేయర్‌ ఎండి మజీద్‌ హుస్సేన్‌, మున్సిపల్‌ శాఖ ముఖ్య కార్యదర్శి, సమీర్‌ శర్మ, కమిషనర్‌ సోమేశ్వరరావు కార్మిక సంఘాల నేతలు పాలడుగు భాస్కర్‌, జె వెంకటేశ్‌, మంగపతి, పార్థసారధి( సిఐటియు) కృష్ణారావు (ఎఐటియుసి) అశోక్‌కుమార్‌ (బిఎమ్‌ఎస్‌) రామారావు (హెచ్‌ఎమ్‌ఎస్‌) శ్రీనివాస్‌(టిఎన్‌టియుసి) మారుతీరావు (టిఆర్‌ఎస్‌వికెవి) కృష (ఐఎఫ్‌టియు) సుధీర్‌(ఎఐయు టియుసి)లతో చర్చలు జరిపారు. 

ఈ చర్చల్లో జిహెచ్‌ఎమ్‌సి పరిధిలోని ఉద్యోగులకు 27 శాతం, మున్సిపాల్టీ పరిధిలో 25 శాతం, నగర పంచాయితీలో 23 శాతం మధ్యంతర భృతి చెల్లించడానికి ప్రభుత్వం అంగీకరించింది. శాశ్వత ఉద్యోగులకు హెల్త్‌కార్డులు, జిపిఎఫ్‌ ఖాతాలు, ఇండ్లు, ఇండ్ల స్థలాలు, పిఆర్‌సిలో ఫైనల్‌ అయినటువంటి శాశ్వత ఉద్యోగుల బేసిక్‌ వేతనాన్ని జిహెచ్‌ఎమ్‌సీతో పాటు కార్పొరేషన్లు, నగర పంచాయితీల్లో కూడా అమలు చేస్తామని మంత్రి హామి ఇచ్చారు. దీంతో సమ్మెను విరమించేందుకు కార్మిక సంఘాలు అంగీకరించాయి. 

కార్మిక కుంటుంబాల శ్రేయస్సు కోసమే : మంత్రి

మున్సిపల్‌ కార్మిక కుటుంబాల శ్రేయస్సు కోసమే వారి వేతనాలను పెంచామని మున్సిపల్‌ శాఖ మంత్రి మహిధర్‌రెడ్డి చెప్పారు. పెంచిన వేతనాల వల్ల ప్రభుత్వంపై రూ.140 కోట్ల భారం పడుతుందన్నారు. పెరిగిన ధరలకనుగుణంగా ఒక్కో ఉద్యోగి నెలకు కనీసం రూ.10 వేల వేతనం అందేలా చర్యలు తీసుకున్నామన్నారు. దీంతో పాటు డ్రైవర్లు, క్లీనర్లు ప్రమాదవశాత్తు మరణిస్తే రూ.10 లక్షల బీమ, సాధారణ ఉద్యోగులకు రూ.5 లక్షల బీమా అందజేస్తామన్నారు. ఉద్యోగి మరణిస్తే అంతక్రియలకు రూ.10 వేలను వెంటనే అందజేస్తామని తెలిపారు. 

వారంతరపు సెలవుతో పాటు, 8 పబ్లిక్‌ సెలవులను కూడా మంజూరు చేశామని మంత్రి చెప్పారు. ప్రజల ఆరోగ సమస్యలు దృష్టిలో పెట్టుకొని భవిష్యత్తులో ఎలాంటి సమ్మెలు నిర్వహించకుండా చర్చల ద్వారానే సమస్యలు పరిష్కరించుకోవాలని మంత్రి విజ్ఞప్తి చేశారు.

ఇది తాత్కాలిక విరమణే : కార్మిక సంఘాలు 

ప్రభుత్వంతో చర్చలు పూర్తి స్థాయిలో సఫలం కాలేదని, తాత్కాలికంగానే సమ్మె విరమిస్తున్నామని కార్మిక సంఘాలు ప్రకటించాయి. మధ్యంతర భృతిపై ప్రభుత్వంతో చర్చలు సఫలం అయినందునా వెంటనే విధుల్లోకి హాజరుకావాలని విజ్ఞప్తి చేశారు. 

పెరిగిన వేతనాలు

జిహెచ్‌ఎమ్‌సీ పరిధిలోని ఉద్యోగులకు ప్రస్తుత వేతనం రూ.6700 నుంచి రూ.8500, మున్సిపల్‌ కార్పొరేషన్లలోని ఉద్యోగులకు రూ. 6,700 నుండి రూ.8300, నగర పంచాయితీలోని ఉద్యోగులకు రూ. 6,700 నుంచి 7,300 లకు పెంచారు.