అంగన్వాడీల సమస్యలు పరిష్కరించాలని... కృపారాణి కార్యాలయం ముట్టడి Posted on: Sat 01 Mar 00:56:45.51879 2014

- 179మంది అంగన్వాడీలు అరెస్టు, విడుదల   ప్రజాశక్తి - శ్రీకాకుళంరూరల్‌

అంగన్వాడీలకు కనీస వేతనం, రిటైర్మెంట్‌ బెనిఫిట్స్‌ తదితర సౌకర్యాలు కల్పించాలని, సమ్మె నివారణకు జోక్యం చేసుకోవాలని డిమాండ్‌ చేస్తూ సిఐటియు ఆధ్వర్యాన అంగన్వాడీ కార్యకర్తలు
కేంద్ర కమ్యూనికేషన్లు, ఐటిశాఖ సహాయమంత్రి కిల్లికృపారాణి క్యాంపు కార్యాలయాన్ని శుక్రవారం ముట్టడించారు. తమ సమస్యలు ప్రభుత్వం దృష్టికి తీసుకెళ్లాలని పెద్దపెట్టున నినాదాలు చేస్తూ కార్యాలయం ఎదుట బైఠాయించారు. ఈ సందర్భంగా సిఐటియు జిల్లా ఉపాధ్యక్షులు పంచాది పాపారావు మాట్లాడుతూ న్యాయమైన సమస్యల పరిష్కారానికి అంగన్వాడీలు ఆందోళనలు చేస్తుంటే, ప్రభుత్వం దొంగనాటకాలాడుతోందని దుయ్యబట్టారు. గత్యంతరం లేని పరిస్థితుల్లోనే సమ్మె కొనసాగించాల్సి వస్తోందని చెప్పారు. పొరుగు రాష్ట్రాలైన కేరళ, తమిళనాడు, కర్నాటక మాదిరిగా అంగన్వాడీలకు కనీస వేతనం రూ.పది వేలు చెల్లించాలని, రిటైర్మెంట్‌ సదుపాయాలు కల్పించాలని డిమాండ్‌ చేశారు. ప్రభుత్వం వాగ్ధానాలు చేస్తుందే తప్ప, సమస్యలను పరిష్కరించడం లేదని విమర్శించారు. కేంద్రమంత్రి కృపారాణి కార్యాలయంలో లేకపోవడంతో సమస్యలు చెప్పేందుకు ఫోన్‌ చేసినా ఆమె అందుబాటులోకి రాలేదు. 

179మంది అరెస్టు

భారీ బందోబస్తు ఏర్పాటు చేసిన పోలీసులు కార్యాలయం ఎదుట బైఠాయించిన అంగన్వాడీలను అరెస్టు చేసేందుకు ప్రయత్నించడంతో ఉద్రిక్త పరిస్థితి నెలకొంది. సిఐటియు జిల్లా ఉపాధ్యక్షులు పంచాది పాపారావు, పట్టణ అధ్యక్ష, కార్యదర్శి కె కళ్యాణి, డి గణేష్‌, అంగన్వాడీ వర్కర్స్‌ అండ్‌ హెల్పర్స్‌ యూనియన్‌ పట్టణ కార్యదర్శి టి రాజేశ్వరితో సహా మొత్తం 179మందిని అరెస్టు చేసి మహిళా పోలీస్‌స్టేషన్‌కు తరలించారు. అనంతరం సొంత పూచీకత్తుపై వారిని విడుదల చేశారు. ముట్టడిలో అంగన్వాడీ యూనియన్‌ నాయకులు డి ప్రమీల, ఆదిలకిë, పార్వతి, సంధ్య తదితరులు పాల్గొన్నారు.