ప్రభుత్వ విద్యను కాపాడుకోవాలి

Posted on: Thu 16 Jan 00:52:39.270521 2014

మాతృదేవో భవ, పితృదేవోభవ, ఆచార్య దేవోభవ అన్నారు పెద్దలు. తల్లిదండ్రుల తరువాత స్థానం గురువులకే దక్కుతుంది. సమాజంలో గురువులది ప్రత్యేక స్థానం. పిల్లల్ని సమాజంలో మంచి పౌరులుగా తీర్చిదిద్దడంలో ముఖ్యపాత్ర వహిస్తారు. కేవలం జ్ఞానాన్ని అందించడమే కాదు.. దేశ పౌరులుగా తీర్చిదిద్ద డంలోనూ ప్రథమ స్థానం వారికే దక్కుతుంది. మరి ఇలాంటి గురువులే పిల్లల పట్ల అంత కర్కశంగా ఎలా ప్రవర్తిస్తున్నారు? ప్రయివేటు స్కూలు యాజ మాన్యాల కఠిన వైఖరి వల్ల పిల్లలు ప్రాణాలు సైతం కోల్పోతున్నారు. యాజ మాన్యాల దారుణమైన నిర్ణయాల వల్లే ఈ అనర్ధాలని చెప్పుకోవచ్చు. నేడు విద్య కూడా కార్పొరేట్‌ అయి పోయింది. చదువు కునేందుకు కాకుండా చదువుకొనేలా మారి పోయింది. ప్రయివేటు స్కూళ్లలో అవసరం ఉన్నా లేకపోయినా నోట్‌బుక్స్‌ వాడుతున్నారు. పలకలు ఎప్పుడో బూజుపట్టిపోయాయి. ఆ పుస్తకాలు మోయలేకే పిల్లల వెన్నుపూసలు కరిగి పోతున్నాయి. ఈ ఆర్భాటాలన్నీ చూసి పిల్లల తల్లిదండ్రులు ఇలా ఉంటే బాగా చదువొస్తుంది. చదువు బాగా చెబుతారు అనే భ్రమలో పడుతున్నారు. పొద్దస్తమానం చదువు కోసం కూర్చోవడం వల్ల పిల్లలు మానసికంగా కుంగిపోతున్నారు. ఆడుకునే వయసులో మెదడుకు విపరీతంగా పని చెబుతున్నారు. వారు చదివే చదువుకు మెదడును అంతగా ఇబ్బంది పెట్టనవసరం లేదని నిపుణులు సైతం చెబుతున్నారు. అయినా వారి మాటలను బేఖాతరు చేస్తూ ప్రయివేటు స్కూళ్ల యాజ మాన్యం చేయాల్సింది చేసుకుంటూ పోతోంది. ఈ పరిణామాల వల్ల పిల్లల ప్రాణాలు పోతున్నాగానీ ఏమాత్రం చలించడం లేదు. కేవలం డబ్బు మోజులో పడి మానవీయ విలువల్ని తుంగలో తొక్కుతున్నారు. మొన్నీమధ్యకాలంలోనే స్కూలు ఫీజు కట్టలేదని అమ్మాయిని ఎండలో నిలబెట్టడం వల్ల స్పృహతప్పి పడిపోయి మృతి చెందింది. స్కూలు యాజమాన్యం ఎంత దారుణంగా ప్రవర్తించిందో దీన్నిబట్టే అర్థం చేసుకోవచ్చు. అలాగే ఒక్క ఫీజు కట్టలేదనే కాదు.. భాషాపరంగా కూడా పిల్లల్ని చిత్రవధ చేస్తున్నారు. కేవలం ఆంగ్ల భాషలోనే మాట్లాడాలనే నిబంధనతో పిల్లల్ని చావబాదిన ఘటనలెన్నో ఉన్నాయి. ప్రభుత్వ స్కూళ్లలోని ఉపాధ్యాయులు పేద పిల్లలకు ఫీజులు కట్టడం, పుస్తకాలుకొనివ్వడం చేస్తూనే ఉంటారు. ఎందుకంటే వారికి విద్య పట్ల అంత మమకారం ఉంటుంది. కానీ ప్రయివేటు స్కూళ్లలో మాత్రం పిల్లలకు ఫీజులు కట్టడం లేదు సరికదా కొంచెం లేటయినందుకు చాలా కఠినంగా ప్రవర్తించి వారి ప్రాణాలు పోయేలా ప్రవర్తించడం చాలా బాధాకరం. ఇది కేవలం ఓ ఉదాహరణగానే చెప్పుకోవచ్చు. ఇలాంటి ఘట నలు జరుగుతున్నా పాల కులు కూడా అటువంటి యాజ మాన్యాలపై చర్యలు తీసుకోక పోవడం గమనార్హం. 

ప్రభుత్వ స్కూళ్లలో చదువు సరిగ్గా చెప్పరు, ఉపాధ్యాయులు సరిగ్గా ఉండరు, మౌలిక వసతులు సరిగ్గా ఉండ వనే కారణంతో తల్లి దండ్రులు తమ పిల్లల్ని ప్రయివేటు స్కూళ్లకు పంపడం అలవాటు చేసుకుంటున్నారు. సర్కారు బడి చెత్తబడి అనే భ్రమలోకి వెళుతున్నారు. కానీ తల్లిదండ్రులు గమనంలో ఉంచుకోవాల్సింది అది ప్రభుత్వ పాఠశాల.. అంటే పిల్లలకోసం ప్రభు త్వమే ఏర్పాటు చేసిన పాఠశాల. ఉపాధ్యాయులు సైతం ఎంతో నైపుణ్యం ఉన్నవారు. ప్రయివేటు స్కూళ్లమాదిరి ఆషామాషీ ఉపాధ్యాయులు కాదు. మానవీయ విలువలకు ప్రత్యక్ష రూపం. ఫీజులు చెల్లిస్తేనే చదువు బాగా చెబుతారు. ఏదో తమ పిల్లలు ఉన్నతస్థాయిలో బ్రతుకుతారు అను కోవడం పొరపాటు. ప్రయివేటు స్కూళ్ల పిల్లల మార్కుల శాతం కన్నా ప్రభుత్వ స్కూళ్లలోని పిల్లల మార్కుల శాతం మెరుగ్గా ఉంటోంది. దానికి కారణం ఒత్తిడి విద్య కాదు.. మెరుగైన విద్యవారికి అందుతోంది. అలాంటి విద్య అందితేనే పిల్లల భవిష్యత్తు బాగుంటుంది. ఇవన్నీ తల్లిదండ్రులు గమనంలో ఉంచుకోవాలి. ప్రభుత్వ పాఠశాలల్లో వసతుల కోసం కోసం కృషి చేసి సాధించుకోవాలి తప్ప ప్రత్యామ్నాయంగా ప్రయివేటు స్కూళ్లవైపు మొగ్గుచూపడం సరికాదు. 

- లక్ష్మీ భవాని, గుంటూరు